Nervios, imprecisións, erros e precipitacións en bastantes fases, ademais dunha defensa que non estivo á súa altura habitual. A todo iso e a un rival complicado, que se xogaba boa parte das súas opcións de seguir aspirando a meterse na fase de ascenso, foi capaz de sobrepoñerse o Cisne para dar un paso de xigante, mantendo a vantaxe de seis puntos (tres partidos) sobre os seus rivais na pelexa polo liderado, a falta de só seis xornadas para o final da liga regular.
O partido entre Cisne e Chapela non defraudou. Se o xogo non foi o mellor que ambos os dous equipos poden realizar, en cambio a emoción e incerteza polo resultado foi máxima. Igualdade absoluta dende o asubío inicial, co técnico visitante, Frank Teixeira, metendo o seu habitual punto de presión á parella arbitral xa nas súas primeiras decisións.
Cando o ambiente se calmou, pronto se viu a un Cisne precipitado, excesivamente responsabilizado pola importancia do partido, que non se sentía cómodo na pista, diso aproveitábase un Chapela ben conducido por Escudero e con Pablo Casal como brazo executor. A resposta local chegaba case sempre das mans de Álex Chan ou Rafa Dasilva.
As alternativas foron constantes, pero as vantaxes para un e outro equipo nunca superaron os dous goles. O Cisne pareceu encarrilar o partido ao poñerse dous arriba (26-24) a falta de pouco máis de nove minutos, pero non estaba o día para a tranquilidade de ninguén. Reaccionou o Chapela, que mesmo se puxo en vantaxe (28-29) con só minuto e medio por xogar.
Parecía que o partido se lle escaparía aos de Edín Covelo, pero Álex Chan e Edu Covelo daban a volta ao marcador, sen que o Chapela, que dispuxo de algo máis de medio minuto do balón en ataque, lograse igualar de novo.
BM CISNE (29): Toño Lafuente, Pablo Galán, Santiago Cuenca; Iván Abilleira, Pepe Camiña, Álex Chan (9), Edu Covelo (3), Rafa Dasilva (5), Bruno Montesinos, Pablo Picallo (1), Carlos Rodríguez (1), Andrés Sánchez (4), Miguel Simón, Javi Vázquez (5) e Pablo Vidal (1).
BM CHAPELA (28): Suso Soliño, Daniel González; Adrián Blanco, Javi Carrera (3), Pablo Casal (9), Chema Cid (2), Cuadrado, Escudero (4), Enrique Fernández (2), Rubén Gómez (4), Fabián (2), López Tarazaga, Ángel Martínez e Miguel Sío (2).
Árbitros: Fernando Iñán Arias e José Manuel García Olavarrieta (Cantabria). Excluíron por dous minutos a Rafa Dasilva e Miguel Simón (2), polos locais, e a Pablo Casal, Iago Cuadrado (2) e Fabián, polos visitantes.
Marcador (cada cinco minutos): 1-2, 4-3, 6-6, 8-9, 11-12, 14-13 (descanso), 16-15, 19-18, 21-22, 25-24, 27-26 e 29-28 (final).
Incidencias: Pavillón do CGTD (Pontevedra). Uns 200 espectadores. Na bancada presenciou o partido o expresidente da Federación Española de Balonmán, Juan de Dios Román.