O pechacancelas BM Cañiza asalta o Municipal e deixa xeado o Teucro

Sábado aciago para a Sociedade Deportiva Teucro no Pavillón Municipal dos Deportes.

O equipo pontevedrés, que chegaba con tres triunfos consecutivos, viuse sorprendido polo pechacancelas da Primeira Nacional, o BM Cañiza encaixando unha dolorosa derrota (28-32).

Os da Cañiza só gañaran un encontro esta tempada, pero non se notou sobre a pista do Municipal marcando a pauta de principio a fin ante un Teucro que aspiraba a meter presión na pelexa pola segunda praza e que agora ve como se afasta o seu obxectivo.

Os visitantes aproveitaron as imprecisións teucristas para marcar un 0-5 de saída que avisaba de como se podía presentar o duelo.

Parecía querer reaccionar o cadro azul recuperando timidamente sensacións cun 4-7 aos 10 minutos de xogo, pero o partido seguía avanzando e o Cañiza incrementaba a súa diferenza até un contundente 8-14 ao descanso.

Moito debía mellorar o Teucro tras o paso por vestiarios, pero esta vez non chegou a reacción.

O BM Cañiza, co marcador a favor, controlou o partido cun Teucro que só puido maquillar levemente o resultado nos instantes finais.

Unha tarde para esquecer que deixa aos azuis na cuarta posición do campionato con 16 puntos.