O Concello de Poio aprobou as bases das axudas municipais para fomentar o deporte local.
Como principal novidade entre as tres liñas de actuación por primeira vez ábrese a posibilidade de achegar fondos a clubs de fútbol con equipos que participen en categorías de veteranos.
Ademais estas subvencións están destinadas a clubs e entidades que figuren rexistradas no rexistro municipal de asociacións, e a deportistas federados empadroados en Poio cunha antigüidade mínima dun ano e que compitan en modalidades deportivas de carácter individual.
Entre os gastos subvencionables con estas axudas inclúense licenzas federativas, seguros deportivos, cotas de inscrición en competicións federadas, gastos de transporte, mantemento e aloxamento para asistir a competicións, salarios de adestradores ou outros gastos propios da participación en competicións.
As axudas, cun montante global de 34.150 euros, cubrirán gastos xustificables entre o 1 de agosto de 2023 e o 31 de xullo de 2024.
Segundo explica o Concello, destinaranse en concreto 28.150 euros á liña 1 (clubs e entidades), 4.000 euros á liña 2 (deportistas individuais) e 2.000 euros á liña 3 (veteranos).