Tivo que suar o Poio Pescamar para sumar o seu primeiro triunfo da liga e comezar así a tempada con bo pé, a pesar do contundente do resultado final (6-0).
O equipo conserveiro arrincaba o seu novo e ambicioso proxecto deportivo recibindo na Seca o AE Penya Esplugues, que opuxo resistencia e vendeu cara a derrota.
As vermellas dominaron o encontro desde o inicio, e súas foron as mellores ocasións da primeira metade.
A primeira chegou nas botas de Zaide Pérez nun envío ao segundo pau do Martita, atopando unha gran intervención da gardameta visitante Julia.
Tamén puido marcar o Esplugues nun envío en longo para Laia Beltrán, cun remate que se lle marchou desviado, pero as catalás afanábanse sobre todo en manter a súa porta a cero.
Carolina Bravo en xogada persoal gozou dunha gran opción á contra, pero non logrou regatear á porteira visitante. Ale de Paz cruzando en exceso, unha acción de estratexia salvada baixo paus e un disparo de Zaide que se foi desviado por milímetros puideron supor o 1-0, pero o marcador non se movería ao descanso.
Parecía que o guión seguía polo mesmo camiño no inicio do segundo acto, ata que chegou o minuto 24 de partido, que supuxo un antes e un despois. Carol cometía penalti sobre Débora e Ale de Paz aproveitaba a ocasión para pór o 1-0 no marcador.
Derrubado o muro, non tardou de chegar o segundo tanto, por medio de Zaide Pérez cun potente e axustado disparo.
Tentou reaccionar o Penya Esplugues, pero o que terminou chegando foi a goleada. A propia Zaide repetía diana no terceiro, e Ale de Paz conseguía o cuarto cun lanzamento de falta.
A falta de 12 minutos para o final e con ese 4-0 xa no electrónico, o conxunto visitante queimou as súas naves apostando polo xogo de cinco, pasando a dominar a posesión en maior medida.
O que chegaría con todo sería a sentenza con dous goles máis por medio de Pedreira e Rafa Pato, colocando o definitivo 6-0.
Un inicio máis que positivo para o equipo adestrado por Luís López-Tulla, co que gañar confianza para todo o que está por vir.