Varias semanas despois do convulso final de tempada marcado pola polémica non clasificación ao play-off de ascenso, o Pontevedra Club de Fútbol xa se prepara para un novo e ilusionante reto en Primeira Federación.
Para iso tiveron lugar os primeiros recoñecementos médicos aos xogadores do primeiro plantel dirixido por Rubén Domínguez.
Desde este luns, algunhas das caras máis reconocibles como a de Yelko Pino, Raúl Marqueta, Álex Comparada 'Compa' ou Juanra deixáronse ver polo Hospital QuirónSalud Miguel Domínguez.
Xunto a eles, varias caras novas, pois tamén pasaron polas probas médicas algúns dos novos efectivos do cadro granate como Domingo Mba, Iker Ivorra, Adrián Argos ou o gardameta Iker Galindo.
Todos e cada un dos xogadores que compoñen o primeiro plantel ata a data pasarán polas pertinentes probas médicas antes de que o balón bote a rodar na primeira sesión de adestramento da pretemporada.
Será, se todo vai segundo o previsto, este mércores 15 de xullo no Manolo Barreiro.
Ese día marcará o comezo dunha pretemporada que se estenderá ao longo dun mes e medio. Durante esas semanas, Rubén Domínguez e o seu corpo técnico terán o labor de preparar o equipo para chegar nas mellores condicións posibles ao primeiro partido da tempada fixado o 30 de agosto ante o Real Avilés.
A estas alturas aínda se descoñecen os rivais do Pontevedra CF para os partidos de preparación que se disputarán nas próximas semanas.
Engade Pontevedra Viva como fonte preferida de Google de balde
Mantente informado coas últimas noticias de actualidade.