Novo capítulo na batalla legal aberta polo Pontevedra Club de Fútbol tras a decisión do Xuíz Único de Competición de outorgarlle a quinta praza do Grupo 1 de Primeira RFEF, e por tanto un posto no play-off de ascenso, ao Real Madrid Castilla, en detrimento dos granates no triplo empate entre eles e o Barakaldo.
A entidade pontevedresa, cumprindo cos prazos dados pola Real Federación Española de Fútbol (RFEF), confirmou este mércores a presentanción de maneira formal dun recurso ante o Comité Nacional de Segunda Instancia da RFEF.
Cabe lembrar que Competición, na súa resolución, concedía un prazo improrrogable de 48 horas ao Pontevedra desde o momento da notificación para interpor este recurso.
Desta forma o club granate "continúa así coa defensa dos dereitos e intereses deportivos da nosa entidade".
COMUNICADO OFICIAL | El Pontevedra CF informa que, en el día de hoy se ha presentado formalmente recurso ante el Comité Nacional de Segunda Instancia de la Real Federación Española de Fútbol, continuando así con la defensa de los derechos e intereses deportivos de nuestra entidad pic.twitter.com/hs911WqBYi
— Pontevedra CF 🦴 (@PontevedraCFSAD) May 27, 2026
O fallo de Competición, publicado a última hora do luns, denegaba a suspensión cautelar da fase de ascenso a Segunda División, tal e como solicitaba o Pontevedra Club de Fútbol.
De feito o partido de ida da eliminatoria entre o Castilla e o Sabadell, a que correspondería aos pontevedreses, fixouse xa para este venres 29 de maio, deixando case sen tempo á reacción.
É por iso que a pesar da exclusión do citado play-off, o primeiro plantel granate segue a exercitarse esta semana á espera de coñecer o resultado do recurso presentado desde as oficinas de Pasarón.
De ser de novo o fallo contrario aos seus intereses, a entidade da Boa Vila deberá sopesar os seus seguintes movementos, coa posibilidade de elevar o caso ao Tribunal Administrativo do Deporte (TAD), aínda que esta vía non arroxaría un desenlace inmediato descartando por completo a posibilidade de ascenso no actual play-off.
Engade Pontevedra Viva como fonte preferida de Google de balde
Mantente informado coas últimas noticias de actualidade.