Pontevedra acollerá no 2019 o Festival Multideporte, a nova competición que vén de poñer en marcha a Federación Internacional de Tríatlon. A súa primeira edición celebrarase do 18 ao 27 de agosto en Penticton (Canadá) e alí xa se promocionará a Boa Vila de cara á súa cita deportiva.
Segundo informou o Concello, será a propia federación a encargada de difundir a imaxe de Pontevedra no Canadá.
Así, diferentes elementos promocionais informarán os triatletas que acoden a Penticton da competición que terá lugar en Pontevedra, para que vaian facendo axenda.
Ademais, este material explica as características e a situación da cidade en Galicia e recorda a ampla experiencia que ten Pontevedra na organización de eventos relacionados co tríatlon.
Tamén se cita que é a cidade na que adestra Javi Gómez Noya, pentacampión do mundo deste deporte e outros deportistas de alto nivel.
O Festival Multideporte, que se celebrará por vez primeira en España no 2019, é un gran acontecemento deportivo que xunta os mundiais de cinco disciplinas: duatlon, acuatlón, tríatlon cross, aquabike e tríatlon de longa distancia.
O propio Gómez Noya asegurou que desexa competir de novo en Pontevedra neste festival, no que se inclinará polo tríatlon de longa distancia.
Engade Pontevedra Viva como fonte preferida de Google de balde
Mantente informado coas últimas noticias de actualidade.