Decepción en Pontevedra. A Federación Internacional de Tríatlon virou as costas, esta vez, ás aspiracións da cidade de contar cun novo campionato do mundo a curto prazo. Nin o Mundial de Dúatlon de 2016 nin o Festival Multideportes -un evento que reunirá na mesma localidade os mundiais de dúatlon, acuatlón, tríatlon cross e tríatlon de longa distancia- en 2017 e 2018, se celebrarán en Pontevedra.
Eran as opcións elixidas polo Concello de Pontevedra para volver apostar por unha competición internacional deste deporte, tras o éxito do Mundial de Dúatlon en 2014. As expectativas eran positivas, como confirmou a presidenta da ITU, Marisol Casado, nunha recente visita á cidade. Pero finalmente, o Comité Executivo da federación optou por outras localidades para organizar estes eventos.
No caso do Mundial de Dúatlon será outra cidade española, a localidade asturiana de Avilés, a que acolla esta competición. Dende a ITU aseguran que o éxito conseguido recentemente coa celebración dos Campionatos de España de 2014 e 2015 e a traxectoria da cidade na organización de eventos deportivos foron determinantes nesta designación.
Pero, sen dúbida, Pontevedra tiña maiores esperanzas no Festival Multideportes que o tríatlon estreará en 2017. Non era para menos. Cada edición celebrarase durante dez días na mesma cidade e a el acudirán miles de atletas -ao coincidir na mesma data moitos deles xa non terán que elixir competir nun mundial ou outro-, adestradores e acompañantes, polo que o retorno económico é francamente superior a calquera outra competición.
A cidade do Lérez apostaba por un proxecto baseado na experiencia organizativa de campionatos anteriores, moi ben valorada tanto pola ITU coma pola Federación Española, pero o Comité Executivo decidiu, por motivos que non rematou de explicar, que a elixida sexa a localidade canadense de Penticton. A Pontevedra tampouco virá a edición de 2018, que na mesma reunión deste órgano federativo se concedeu a Odense (Dinamarca).
Dende o goberno municipal, que soubo este mesmo martes da decisión da ITU, aseguran que tratarán de enterarse dos motivos polos que Pontevedra non foi elixida. Ademais, estudarán se presentan a candidatura da cidade para o Festival Multideportes de 2019, cuxas peticións se poderán enviar á Federación Internacional en próximas datas, ou optan por outro evento ou mesmo por outro deporte para compensar este revés.