Só se levan disputadas cinco xornadas de liga na Primeira RFEF, pero é tempo suficiente para empezar a comprobar tendencias e estatísticas dos equipos participantes.
Un deses apartados, o do xogo limpo, non está a ser especialmente positivo para o Pontevedra Club de Fútbol.
Os granates son, de feito, o segundo equipo que máis cartóns recibe de toda a categoría, contando ambos os dous grupos, cunha media de 4 amoestacións por encontro.
En concreto os homes dirixidos por Rubén Domínguez recibiron no que vai de liga 19 cartóns amarelos, ao que se suma a expulsión por dobre cartón que sufriu Montoro no duelo en Ponferrada.
Só o Ourense CF, con 21 amarelas e dúas expulsións, conta con peor balance.
No Grupo I o seguinte equipo con máis amoestacións é o Arenas de Getxo, con 14 amarelas e dúas vermellas, mentres que o Grupo II encabeza a estatística o Betis Deportivo con 18 amarelas e dúas vermellas.
Polo menos esta situación aínda non carrexa risco de sancións no Pontevedra, e é que as amoestacións están realmente moi repartidas.
Sacando a Antonio Montoro con tres cartóns (aínda que só un conta para acumular xa que os outros dous supuxeron a súa expulsión), só catro futbolistas foron amoestados en dúas ocasións: Dani Selma, Álex González. Miki Bosch e Ander Vidorreta.
Pola súa banda viron unha amarela o técnico, Rubén Domínguez, e os futbolistas Marqueta, Víctor Eimil, Brais Abelenda, Alain Ribeiro, Yelko Pino, Luisao, Joao Resende, Marcos Denia e Comparada.