Non se fía Quique Domínguez do Torrelavega, rival do Teucro este sábado (20:00 horas) no Pavillón Municipal dos Deportes de Pontevedra.
O técnico azul asegura que "sorprende mucho su clasificación viendo la plantilla que tienen", e é que os cántabros son últimos da División de Honra Prata, aínda que cun encontro menos que os seus rivais.
Quique Domínguez: "Sorprende mucho su clasificación viendo la plantilla que tienen"
Domínguez pensa que "si tienen el día pueden poner en aprietos a cualquiera", polo que incidiu en evitar fallos de concentración para amarrar dous puntos que poden deixar ao Teucro moi preto do ascenso, toda vez que os seus dous inmediatos perseguidores, Sinfín e Valladolid, se enfrontan entre si.
Non chegarán á cita os lesionados David Chapela e Carlos Pombo, que malia todo evolucionan favorablemente das súas respectivas doenzas.
No caso de Pombo dáse case por segura a súa reaparición a próxima semana en Vigo no derbi ante o Octavio, non así con Chapela "que va mejor pero lento", declarou o seu técnico.
Pola súa banda o Torrelavega comparecerá en Pontevedra con dúas importantes ausencias, as de Abel Lamadrid e Joaquín Marcos.