O Teucro, tras o parón do Mundial, regresa á competición este sábado (Pavillón La Albericia 18.00 horas) cun partido contra o BM Sinfín, equipo revelación da primeira volta.
Co obxectivo da permanencia, o equipo pontevedrés empeza a segunda parte da tempada viaxando coas tres novas incorporacións, Yano Piovarczik, Vicente Poveda, e Ismael Bela, que gozarán de minutos na rotación, e recupera aos lesionados Cangiani e Andrés Moyano que na última semana traballaron a menor ritmo por problemas físicos.
Samu Gómez cae da convocatoria por lesión e únese a Juan Quintas nas baixas pero, a pesar diso, Luís Montes confía no equipo e afirma que "esta última semana adestramos moi ben e viaxamos con toda a ilusión de poder sacar algo positivo contra un equipo con gran consistencia e solidez defensiva, especialmente na súa casa".
Neste mes reorganizáronse, perdendo a un central puro e con gran capacidade no un contra un pero incorporan a Vicente Poveda, "que dá máis consistencia defensiva" asegurou Montes, coa que tentarán reducir o número de goles fáciles que recibían ata agora.
O partido estará dirixido polos andaluces Fernández Molina e Murillo Castro.