Na capital de Perú, Lima, atópase xa a representación do Mace Sport que tomará parte no Campionato do Mundo de Taekwondo nas modalidades de Técnica e Freestyle.
Cinco deportistas do club pontevedrés gañáronse o dereito para competir na capital peruana do 29 de setembro ao 2 de outubro.
Trátase de Ángel López, Sarai Pazos, Ana Isabel Pita, Adrián Ventín e Iago Pita. Todos eles participarán no quinteto na categoría de 17 anos, e ademais Iago Pita competirá tamén na categoría individual.
É a décima edición deste Campionato do Mundo, que reunirá en Lima a máis de 1.000 deportistas de 55 nacionalidades distintas.
Ademais dos taekwondistas do Mace Sport, Galicia estará representada por 8 deportistas do Tao vigués e 3 do Hebe de Moaña.