Rubén Domínguez analizou en rolda de prensa a contundente vitoria do seu equipo fronte o Athletic B (4-0), un resultado que deixa todo de cara ao Pontevedra para lograr a clasificación ao play-off nas dúas xornadas que restan de competición.
Comezou a súa comparecencia falando do gran papel de Alberto Gil no carril dereito, posición na que non é habitual velo xogar pero que "sabemos que é un xogador que ten moi bo centro, que ten desborde cara fóra", polo que "tiñamos plena confianza nel".
Outro dos xogadores que se reivindicaron foi precisamente Expósito, que aproveitou os seus minutos no tramo final para facer un auténtico golazo. "O gol é o premio ao que el fai", explicou Domínguez ao detallar que "igual outro tipo de xogadores baixan os brazos, el é un exemplo, é exemplar. É un mozo marabilloso".
"Todos os xogadores de banco foron celebralo con el e iso indica a clase de persoas que forma este vestiario", afirmou o adestrador do cadro lerezano.
Esta goleada mantén o gran momento dun Pontevedra que, aínda que teña a etiqueta de ser un equipo defensivo, é "o sexto equipo máis goleador da liga. Anuláronnos 11 goles, tivemos 10 paus e fallamos 4 penaltis".
"O que pasa é que somos un equipo ordenado, somos un equipo responsable e cando encaixas pouco se che pon a etiqueta de defensivo", explicou o adestrador do conxunto granate ao falar do potencial goleador do seu equipo.
A vitoria fronte o Athletic B permite o Pontevedra "ter a primeira bóla de partido" no Heliodoro Rodríguez e, no peor dos casos, "traémonos a Pasarón o factor cancha". Aínda que a clasificación á fase de ascenso pode quedar pechada en Tenerife, "pase o que pase, o que está seguro é que a xornada 38 vai ser unha gran festa"
"É un momento de gozar, un momento de ilusionarse e a ver que pasa, porque creo que este equipo se algo está a demostrar é que é capaz de todo", afirmou Domínguez.
Unha das fortalezas que máis destaca o técnico ourensán é a capacidade do equipo de reporse ante as adversidades. Xogadores como Vido, Alberto Gil ou Alain renderon a gran nivel en posicións menos habituais e todo iso explica que este Pontevedra "é un equipazo".
Tamén destacou o estado do céspede de Pasarón, que volveu mostrar as súas costuras por mor das intensas choivas nas horas previas ao partido. O terreo de xogo foi complexo para os xogadores, pero non hai que lamentar baixas xa que "temos a Carlos Arosa, que é un animal e tenos como motos".
En definitiva, Rubén Domínguez fai fincapé na gran actitude do equipo, tanto dos máis protagonistas como dos que teñen menos minutos. Un exemplo é Luisao, que "cambiou moito niso e desde aquí quero felicitalo".
"Eles tómano con naturalidade, o primeiro é o equipo. Poñen o equipo por diante, non baixan os brazos, traballan e aprenden", detallou o adestrador ourensán ao comentar que "o gran mérito é do tipo de plantel e do tipo de xogador que hai"
Non esqueceu nas súas declaracións ao Pontevedra B, que terá a oportunidade de selar o seu ascenso a Terceira Federación: "O filial é un equipazo para a súa categoría. Hai xogadores que teñen que seguir crecendo e seguro que con este ascenso os vai reforzar".
O encontro disputarase fronte o Atlético Arnoia este domingo ás 17.00 no Municipal de Pasarón.
Engade Pontevedra Viva como fonte preferida de Google de balde
Mantente informado coas últimas noticias de actualidade.