Non hai dous sen tres. O Pontevedra pechou este luns no último día de mercado unha nova fichaxe en forma de cesión.
E do mesmo xeito que con Luisao a principio de tempada e con Diego Gómez nos últimos días, o protagonista aterra na Boa Vila desde o Real Club Deportivo.
Trátase de Rubén López, centrocampista natural de Silleda de 21 anos e dunha gran proxección, que sae do club coruñés tras gozar de poucas oportunidades na primeira metade da tempada cos de Riazor na Segunda División.
López foi formado desde categoría cadete polo Deportivo, pero tras debutar co primeiro plantel en Primeira RFEF saíu como cedido o seguinte curso para ser protagonista no Barça Atlétic na mesma Primeira RFEF.
No filial do Barcelona xogou 35 partidos (25 como titular) antes de regresar a Coruña e tentar gañar un posto no fútbol profesional.
Con múltiples pretendentes, terminouse por decidir pola oferta que lle chegaba desde Pontevedra ata final de curso na busca de recuperar continuidade e tentar relanzar a súa carreira, manténdose ademais preto da súa familia.
Aínda que actuou sobre todo no centro do campo, Rubén López xogou tamén en ocasións no lateral zurdo.
A súa é a cuarta incorporación invernal do Pontevedra Club de Fútbol.
No mes de xaneiro no que tamén chegaron o central Álvaro Pérez e os extremos Alberto Gil e Diego Gómez.