110 corredores gozan do atletismo máis puro na Illa das Esculturas

A Illa das Esculturas converteuse este domingo no punto de encontro perfecto para os que gozan do atletismo na súa versión máis auténtica: o campo a través.

"Un lugar de encontro para os amantes do barro", chanceaban os organizadores mentres os atletas preparábanse para a segunda edición do Cros Cidade de Pontevedra, unha cita que empeza a consolidarse no calendario deportivo local.

Organizada pola Sociedad Gimnástica de Pontevedra, a proba buscou unha vez máis fomentar o atletismo ao aire libre nunha contorna privilexiada, a Illa do Covo, onde natureza, deporte e arte danse a man.

En total, 110 corredores se calzaron as zapatillas para enfrontarse ao circuíto, desde os máis pequenos de categoría benxamín, que completaron 500 metros, até os sénior e máster, que percorreron 6.000 metros de pura enerxía.

Esta vez a meteoroloxía aliouse cos participantes e as nubes aguantaron esa choiva que protagonizou a primeira edición, permitindo gozar dunha mañá deportiva en condicións ideais e sen ese barro que prometían.

Ás 11:50 horas foi a quenda das categorías sub-16, sub-18 e sub-20, con 41 atletas competindo nunha distancia de 3,5 quilómetros.

Os máis rápidos foron Sabela Martínez e Hugo Dopazo, ambos da Sociedad Gimnástica, seguidos por Irma Veiguela e Laura Porto e Diego Collazo e Hugo José Huerta.

A xornada pechou ás 12:15 horas coa saída conxunta de sub-23, sénior e máster, na que 69 corredores puxeron o broche final a unha mañá de esforzo, compañeirismo e diversión.

Nela, os gañadores foron Paula de la Torre (Sociedad Gimnástica) e Martín Lestido (Club Atletismo Sar), aos que, respectivamente, acompañaron no podio Ángela Rodríguez e Elena Miguens e Miguel Daporta e Daniel Vila.