Este domingo converteuse nun día inesquecible para Susana Rodríguez Gacio.
A paratriatleta de Vigo logrou quitar a espiña xarada hai dous anos ao alzarse co primeiro posto no Campionato do Mundo Multideporte de Pontevedra.
Cabe lembrar que, na Gran Final das Series Mundiais de 2023, tamén celebrada na Boa Vila, a viguesa perdeu o ouro por unha penalización cando ía na cabeza e que resultou decisiva para privala do primeiro posto.
Agora, de novo na casa, a débeda saldouse e o mal grolo esqueceuse ao coroarse campioa mundial xunto a Mabel Gallardo, a guía que a acompañou nos seus primeiros Xogos Olímpicos en Río 2016.
O resto de españois que participaron no dúatlon paralímpico foron Emilio Agüera e Manuel Afonso, en PTWC; Damián Sánchez e Eduardo Oliva, en PTS5; Diego Guerrero e Fernando Anitua, en PTVI; Carmen González, Carmelo Yeray Perez, en PTS4; e Luís Miguel González, en PTS2.
Ademais, catro triatletas duplicarán a súa participación nas probas de Dúatlon e Tríatlon Cros: Kini Carrasco (PTS3), Ricardo Marín (PTS2), Eduardo Oliva (PTS5) e Luís Miguel González Sousa (PTS2).
Na modalidade de acuatlón tomarán a saída o recentemente coroado como campión de Europa, Héctor Catalá e Fernando Anitua en PTVI; a nova promesa paralímpica de Rianxo, Claudia Tubio, en PTS4; Damián Sánchez, Eduardo Oliva e Cristina Miranda, en PTS5; Luís Miguel González e Ricardo Marín, en PTS2, e Manuel Afonso, en PTWC.
Para pechar a cita multideporte, Fernando Anitua e Marcos Garnica, realizarán a proba de longa distancia na clase PTVI.
A acción do Campionato do Mundo Multideporte de Pontevedra continuará o martes e o xoves coas probas de tríatlon e dúatlon cros.