O estadio da Lomba foi escenario este mércores da presentación da primeira fichaxe invernal do Arosa, Tafa Kanteh.
O central catalán é xa un máis no equipo arlequinado e está "totalmente dispoñible", asegura, para debutar esta próxima fin de semana contra a Sarriana se o seu novo adestrador, Míchel Alonso, así o considera.
"O que podo achegar ao equipo primeiro de todo é carácter, a competitividade de querer gañar sempre", defendeu nas súas primeiras palabras como xogador arosista.
Procede do CFJ Mollerussa catalán, pero conta con experiencia en Galicia tras ter militado tres anos no Ourense CF.
De feito co club ourensán conseguiu ascender a Segunda RFEF na campaña 22-23.
Kanteh chega a Vilagarcía cun obxectivo claro en mente, e é que "quero ascender", afirmou.
"Ao final é un club moi ambicioso, a afección aperta e iso ao final esixe aos xogadores que deamos o mellor", sinalou sobre o seu novo equipo.
Tafa Kanteh é un xogador de 26 anos formado futbolísticamente nas categorías inferiores do Girona.