A Sociedad Deportiva Teucro encaixou a súa terceira derrota da tempada nun partido no que, pese ao bo arranque, non puido manter a vantaxe ante un Calvo Xiria que soubo aproveitar a desconexión final do rival (27-24).
O encontro comezou con certas dúbidas para o equipo pontevedrés, atopándose cun desfavorable 0-2 no primeiro minuto de xogo. Con todo, grazas á reacción de Pintus e Caue Herrera, o Teucro logrou restablecer a igualdade aos cinco minutos.
Emerxeu entón Pablo González como peza crave baixo paus, detendo os lanzamentos do Calvo Xiria que permitiron ao seu equipo alcanzar a súa máxima vantaxe tras un tanto de Monteagudo (3-6).
Pero o dominio do equipo lerezano non se mantivo e, tras uns minutos de intercambio, empezou a afrouxar. Os xogadores teucristas acumularon perdas de balón que, sumadas ás intervencións de Mato en portaría permitiron aos de Carballo irse ao descanso con tres goles de vantaxe (15-12).
Julián García fixo o primeiro tanto do segundo tempo que puxo ao Xiria cun colchón de catro tantos (16-12), pero o Teucro reaccionou, recortando aos poucos a distancia até tomar a dianteira a falta de só tres minutos, grazas a un gol de Marchette que situaba o 22-23 no marcador.
Con todo, a que parecía unha remontada quedou nun mero espellismo. Os últimos minutos foron demoledores para o conxunto pontevedrés, sufrindo un parcial de 5-1, marcado sobre todo por perdas de balón que custaron goles fáciles ao contragolpe do equipo local, que acabou sentenciando por 27-24.
Consulta as estatísticas neste enlace