Máis igualdade do previsto pola diferenza de categorías nos dous partidos semifinais da Copa Galicia de balonmán, disputados no Pavillón Municipal do Rosal. No primeiro choque o Teucro impúxose ao BM Lalín (30-34), mentres que no segundo o Cangas terminou vencendo con moitos apuros ao Atlético Novás (26-29), o que leva aos dous equipos de Asobal a loitar polo título este domingo.
Abría xornada un Teucro que tivo dúas caras. A intensa calor reinante na pista pasou factura aos azuis, que se viron sorprendidos pola boa defensa dos do Deza na primeira parte, así como polo seu bo facer ofensivo. Deste xeito, a igualdade presidiu os primeiros 30 minutos de partido, para chegar ao descanso cunha mínima renda (14-15) para os teucristas.
A segunda parte, coa defensa máis axustada, os de Luís Montes impuxeron a súa lei, cun Davor Cutura (9 goles) imparable, abrindo un oco no marcador que oscilaba entre os tres e catro goles, que souberon manter ata o final (30-34), conseguindo así o pase á final.
CANGAS SOFRE PARA DOBREGAR AO ANFITRIÓN
A segunda semifinal enfrontou ao BM Cangas co equipo anfitrión, o Acanor Atlético Novás, que contou co apoio da bancada para tentar superar aos do Morrazo. E a verdade é que o conseguiron, tanto que non foi ata os minutos finais cando o Cangas puido respirar tranquilo tras conseguir unha máxima vantaxe de catro goles, para terminar vencendo (26-29) e gañarse a outra praza de finalista que lle levará a loitar polo título ante o Teucro (domingo, 13:00 horas, no mesmo escenario).