O Teucro supera o Gáldar e segue invicto en casa

A Sociedad Deportiva Teucro logrou este sábado a súa segunda vitoria en casa, e cuarta da tempada, tras superar o Gáldar Gran Canaria por 29-26. Aínda que os azuis dominaron gran parte do enfrontamento viron como a vitoria se lle complicaba na recta final, pero un dobrete de Agus Franco nos últimos minutos deixou os dous puntos en Pontevedra.

Os erros por parte de ambos os equipos marcaron o inicio do partido, que reflectiu un resultado de 1-3 ao seis minutos de xogo. O Teucro non tardou en porse á altura e empatar, pero o Gáldar volveu responder con dous novos tantos para volver porse por diante no marcador (3-5).

Foi entón cando tanto a defensa como o ataque local mellorou notablemente, e o Teucro conseguiu voltear o resultado e colocarse por diante por primeira vez no enfrontamento.

A máxima diferenza para o equipo lerezano chegou ao minuto 18, cun 13-8, pero unha serie de continuos erros permitiron que os canarios recortasen distancias (13-11), o que obrigou á adestradora local, Irene Vilaboa, a pedir tempo morto para reorganizar ao equipo.

A igualdade mantívose o resto da primeira parte, cun intercambio de goles que se converteu nun 16-14 cando se alcanzou o descanso.

Na segunda metade o encontro volveuse aínda máis intenso, co Gáldar apertando o resultado e o Teucro tentando manterse por diante no marcador. A exclusión de Caue puido complicar as cousas, pero as paradas de Pablo González e os goles de Miguel Monteagudo mantiveron ao seu equipo con vantaxe (21-19).

Con todo, unha vez alcanzouse o tramo final a tensión aumentou. Restaban 4 minutos e Alejandro Castellano anotou o 27-26 que daba un último alento aos canarios, pero os locais, apoiados nunha afección que non parou de animar, sentenciaron cun dobrete de Agus Franco que estableceu o 29-26 definitivo.

Consulta as estatísticas neste enlace