Vai ser unha das grandes citas de 2024, por iso en Pontevedra seguen dando pasos na organización do próximo Campionato de Europa de Ciclocrós, que se celebrará os días 2 e 3 de novembro na Illa das Esculturas.
Un deles foi a elección do lema promocional do evento, 'Where the bikes bótanse ó lombo', unha frase estreada na pasada Copa de España e que estará presente nos anuncios do campionato e tamén en varios puntos do circuíto, como nos obstáculos que se instalarán.
Precisamente o percorrido centra agora mesmo gran parte dos esforzos organizativos, e é que o circuíto da Illa das Esculturas sufrirá cambios con respecto ao proposto nos últimos anos para os Campionatos de España e Copas de España organizadas na Boa Vila.
A intención, segundo sinala a Federación Galega de Ciclismo, é aumentar a dificultade técnica e a espectacularidade para os afeccionados.
Entre outras cousas, avanzan, instalarase un bancal de area para permitir ver o esforzo dos ciclistas sobre esta superficie, uns taboleiros nos que demostrar a habilidade ben saltando sobre a bicicleta ou ben desmontando e tamén se está a traballar para poder contar cunha ponte nas inmediacións do río Lérez, permitindo prolongar a rampla de herba previa á zona de asfalto.
Todo para lograr que o evento sexa todo un éxito prolongando o idilio da Boa Vila cos grandes eventos internacionais.