Despois dun cambio de data e con menos participación que en pasadas edicións, pero co mesmo espírito deportivo e bo ambiente. Así se celebrou este domingo a terceira edición da Ruta BTT Cidade de Pontevedra, organizada polo Club Ciclista Farto.
Preto de 400 afeccionados á bicicleta de montaña tomaron parte nunha agradable xornada deportiva, que tivo o seu inicio e fin na Avenida Montero Ríos.
Os participantes completaron un percorrido de 40 quilómetros, de dificultade media, con subida ao Lago de Castiñeiras e baixada cara Vilaboa antes de regresar á cidade de Lérez.
A organización mostrou a súa satisfacción polo desenvolvemento da proba e confirmou que pensa xa en celebrar a que será a súa cuarta edición.