Os caprichos do actual sistema de competición da División de Honra Prata dan lugar a paradoxos como o que se vai a producir este sábado (18.00 horas) no derbi pontevedrés entre Club Cisne Balonmán e Sociedade Deportiva Teucro.
É só a segunda xornada da segunda volta na primeira fase da liga, pero cos primeiros destacados como líderes do grupo con 18 puntos e cos segundos sendo pechacancelas sen ter puntuado, poucos son os que dubidan de que na segunda fase de competición pelexarán por obxectivos opostos.
Segundo as bases de competición aprobadas pola Real Federación española de Balonmán para esta tempada, os cinco primeiros clasificados pelexarán polo ascenso á Liga Asobal e os cinco últimos por non descender a Primeira Nacional, contando soamente os puntos obtidos ante os rivais directos cos que compartirán segunda fase.
Desta forma o derbi pontevedrés poñerá só a honra en xogo sobre a pista do Municipal, que non é pouco en enfrontamentos deste tipo.
Iso si, se para alguén pode supoñer un punto de inflexión o duelo é para o equipo teucrista, necesitado dunha reacción e a quen un triunfo pode dar todo un xute de moral para o que queda de curso na súa pelexa por evitar o descenso.