Un mal de ollo parece ter caído esta tempada sobre o Club Bádminton Ravachol Pontevedra, abocado xa a loitar pola permanencia na División de Honra nun decisivo play-off a falta de dúas xornadas para a conclusión da fase regular da súa liga.
"Temos unha auténtica praga de lesións desde o inicio da competición, o que leva lastrando ao equipo desde a primeira xornada. Aínda non houbo un partido no que puidese contar co persoal ao completo para facer a aliñación", explica o adestrador do equipo, Jesús Pereiro.
Ese particular gafe tivo nas últimas horas un novo afectado, o xogador Gabriel Fernández, un fixo nas aliñacións durante toda a campaña e que perderá o que resta de competición ao verse afectado por unha miopericardite cardíaca, segundo informa o club pontevedrés. O xogador acudiu o pasado domingo a urxencias ao sentirse indisposto, e desde entón permanece ingresado para realizarlle as probas pertinentes.
"Queremos enviar moito ánimo a Gabi e desexarlle unha pronta recuperación", sinalaron desde o Ravachol.
Ante esta situación a entidade pontevedresa decidiu priorizar o play-off pola permanencia 'renunciando' practicamente ás dúas xornadas de liga que lle restan por completar, empezando pola que lle medirá o vindeiro domingo 27 de febreiro no Multiusos da Xunqueira (11.30 horas) ao CB Oviedo, rival que lle precede na táboa.
"Imos afrontar estas últimas xornadas cunha mentalidade diferente, o obxectivo será economizar e dar ritmo aos menos habituais, mentres os lesionados descansan para tentar estar dispoñibles o 26 de marzo no play-off, que será onde se decida todo", recoñeceu Pereiro.
Ademais do duelo fronte ao Oviedo, o Bádminton Pontevedra ten pendente outra xornada máis de liga antes de finalizar a fase regular, o 13 de marzo recibindo na casa o Arjonilla.