Presentando as súas credenciais para ser un dos equipos da tempada no baloncesto español e europeo.
Así marcha o Valencia Basket de Pontevedra tras proclamarse este sábado campión do X Torneo EncestaRías, vencendo con contundencia na gran final á revelación Breogán (78-101).
O equipo valenciano, adestrado por Pedro Martínez, non acusou as baixas coas que chegaba á cita, e se o venres desfíxose do Baskonia esta vez repetiu co representante galego na máxima categoría e nun Pavillón Municipal dos Deportes que presentaba un ambiente espectacular.
Xa no primeiro cuarto marcou territorio, cun claro 12-28 que marcaba a pauta para o resto do choque.
Mellorou o Breogán no segundo parcial, manténdose no choque encomendándose en ataque a Francis Alonso (13 puntos ao descanso) e chegando ao intermedio cun 39-54.
O Valencia Basket, con todo a favor, controlou desde entón o partido incrementando a súa vantaxe no terceiro cuarto (55-77) e rematando ao final cun marcador de 78-101.
Antes dese partido, a afección pontevedresa vibrou co duelo polo terceiro e cuarto posto que enfrontaba a Real Madrid e Baskonia.
Un partido moito máis igualado no que comezou mandando lixeiramente o Baskonia pero co Real Madrid dándolle a volta antes do descanso. Os de Scariolo, nos seus primeiros partidos como adestrador branco, marcharon ao descanso gañando pola mínima, 40-38, pero non soltaron o mando na segunda metade do partido.
Ao final o resultado foi de 87-80 nun partido que ben podería ter sido a gran final.
O Torneo EncestaRías despídese por tanto co Valencia sucedendo o AS Mónaco no palmarés e deixando ganas de máis. Aínda que para iso haberá que esperar un ano, porque a relación do torneo con Pontevedra apunta a que non fixo máis que comezar.
