Despois de dúas derrotas consecutivas, o Club Baloncesto Arxil quere remontar o voo na Liga Feminina 2, na súa visita á pista do Joventut Les Corts (domingo, 12:30 horas), conxunto co que está empatado na metade da clasificación.
O equipo pontevedrés viaxará no mesmo día a Barcelona, nun desprazamento de ida e volta en avión á primeira hora da mañá para regresar tras o choque.
As de Mayte Méndez esperan poder despregar o seu mellor xogo e esquecer as desconexións momentáneas que lle supuxeron as derrotas na casa ante o Celta e ante o Ensino en Lugo.
Esa será unha das claves do encontro. A outra defender con acerto á máxima anotadora da categoría, Nerea Garmendia, que promedia ata agora 21,25 puntos por partido e é ademais a xogadora que encabeza o ránking de valoración na categoría.
Será o segundo encontro a domicilio consecutivo para as verdes, que esperan ir progresando no seu xogo.