A Sociedad Deportiva Teucro segue dando pasos na construción do seu proxecto de futuro coa incorporación de Víctor Garrido como responsable de base e coordinador de escolas deportivas e formación.
O técnico grovense, de 34 anos, chega a Pontevedra cunha ampla traxectoria no balonmán autonómico, na que pasou por clubs como o Balonmano Reconquista de Vigo, Asmubal Meaño ou Balonmano Xallas.
Ademais, colaborou coa Federación Galega de Balonmán en distintas etapas e categorías, formando parte dos corpos técnicos de seleccións autonómicas.
O propio Garrido recoñeceu que a súa chegada ao club supón "un orgullo tanto a nivel profesional como persoal os meus primeiros recordos do balonmán de elite están ligados aos partidos de ASOBAL que vivín no Municipal, polo que pasar a formar parte do Teucro faime moita ilusión", explica.
Tamén subliñou que se incorpora a "unha entidade histórica que, tras uns anos difíciles, está a dar pasos firmes para recuperar o lugar que lle corresponde".
O do Grove traballará en coordinación co corpo técnico do primeiro equipo, liderado por Sergio Carballeira.
O seu obxectivo, explicou, é establecer unha metodoloxía común en todas as etapas formativas e recuperar o traballo nos centros escolares como vía de captación e crecemento. Quere consolidar unha estrutura de base sólida e coherente que permita ao club volver ser un referente.
💙 Ou futuro tamén se adestra.
— SD Teucro (
Víctor Garrido será ou novo responsable dá Base Azul do SD Teucro e coordinador dás escolas deportivas.
Ampla experiencia non balonmán galego.
Profundo coñecemento dás etapas formativas.
E unha idea clara: construír desde abaixo.
Benvido, Víctor. 💙 pic.twitter.com/PtUcznpd8zsdteucro) May 5, 2026