Primeira xornada do ano na Segunda División B de fútbol sala para Leis e ADFS Bueu, no partido que supón ademais o fin da primeira volta da competición.
Os pontevedreses reciben no Municipal ao complicado Mosteiro Bembrive (sábado, 18:00 horas), un rival directo na clasificación ao marchar cuarto con 25 puntos, un máis que o Leis.
Borja e Barcala son as baixas coas que conta Manu Cossío, que si pode dispoñer do resto do persoal.
Pola súa banda o ADFS Bueu viaxa ás Pontes para render visita a O Esteo (sábado, 17:00 horas), un rival directo pola permanencia que avantaxa en só un punto aos do Morrazo na táboa.
Os de Javi Santos chegan ao comezo de ano coa dúbida de Cristian por motivos laborais e a única baixa confirmada de Adri, que arrastra problemas físicos nun nocello.