O partido de Segunda RFEF que vai enfrontar o vindeiro domingo 13 de marzo na Lomba o Arosa e ao Real Avilés será toda unha de mostrar solidariedade co pobo ucraíno tras a guerra iniciada por Rusia.
O club vilagarcián aproveitará o encontro para levar a cabo unha campaña solidaria en favor de Ucraína, instalando "varios puntos de recollida de produtos nos accesos ao estadio para que todos os nosos afeccionados poidan mostrar a súa solidariedade", sinalou o director xeneral arlequinado, Rodrigo Lojo.
A intención é poder recoller material de primeiros auxilios, artigos de hixiene persoal, comida e tamén produtos relacionados coa covid como máscaras, xel desinfectante e medicamentos. Ademais poderanse realizar doazóns económicas á Asociación Galega de Axuda a Ucraína (AGA).
"Realizaremos unha homenaxe ao seu país. Convidamos a todos os ucraínos, só teñen que presentar o seu DNI e poderán entrar gratis ao partido", sinalou en rolda de prensa Lojo acompañado do presidente da entidade, Manolo Abalo, e de Svitlana Kanevska, veciña de Vilagarcía de orixe ucraína que emigrou desde Donetsk hai dúas décadas.
Svitlana, coñecida na vila como Lana, agradeceu as mostras de apoio recibidas ante a situación que se vive no seu país de orixe e recoñeceu estar "orgullosa de formar parte dunha sociedade tan xenerosa".
Xunto a estas accións o Arosa decidiu regalar a cada un dos seus socios unha entrada para que poidan levar un acompañante ao partido.
Engade Pontevedra Viva como fonte preferida de Google de balde
Mantente informado coas últimas noticias de actualidade.