Este é o resumo das noticias máis visitadas durante este 2024 en PontevedraViva, tanto na páxina web como nas redes sociais deste medio informativo.
Primeiro trimestre: Entre a conmoción e a esperanza
XANEIRO comezaba cunha imaxe singular: Un coche taponaba durante horas o acceso ao parque de bombeiros impedindo a saída dos camións.
Unha denuncia impactaba socialmente durante eses primeiros días do ano: o testemuño desgarrador dunha nai sobre os abusos sexuais que sufría a súa filla adolescente.
Neste mes tamén foi moi seguida a boa noticia do Servizo de Farmacia de Montecelo que lograba a certificación Q-Pex, un recoñecemento pioneiro a nivel mundial.
FEBREIRO quedou marcado pola traxedia marítima: o falecemento dun veciño de Noalla ao caer co seu vehículo ao mar en Portonovo e a morte dun mariñeiro en Raxó.
O mes pechábase cun fatal accidente laboral na histórica Fábrica da Cross. Todos estes sucesos foron seguidos masivamente polos lectores de PontevedraViva.
MARZO trouxo unha das historias máis emotivas: o reencontro do turista alemán Gunter coa súa cadela Molly , que mobilizou a toda a comunidade na súa procura na contorna do río Lérez.
Tamén destacou o curioso incidente do tráiler de Xaén encaixado na Canicouva e o desmantelamento do asentamento chabolista da Ponte do Couto en Pontevedra, fronte ao albergue de peregrinos.
Segundo trimestre: Da loita pola vida á traxedia
ABRIL estivo protagonizado pola conmovedora historia de Estefanía Blanco e a súa procura dun doante de medula .
O deporte local choraba a perda de Maite Méndez , referente do Club Baloncesto Arxil e da actividade deportiva na cidade durante 24 tempadas.
Entre as noticias singulares destacaba durante este mes a intervención dunha bicicleta trucada a un 'rider' .
En maio chegaba a esperada noticia do doante compatible para Estefanía Blanco en América.
Tamén o encontro do atleta Jacobo Soler cun xabaril en pleno centro urbano captou a atención dos lectores.
XUÑO rexistrou o suceso máis impactante do ano: o tráxico accidente na Autovía do Salnés causado por un vehículo que circulaba en sentido contrario, seguido por miles de persoas a través de PontevedraViva.
Tamén conmocionou a denuncia contra unha profesora en Bueu por presuntamente ser a autora de atar a estudantes de tres anos por darse bicos na aula.
Entre as curiosidades que provocaron sorpresa na audiencia figura a historia da parella norueguesa que descubría unha perla nunha ostra mentres ceaban no centro histórico pontevedrés.
Terceiro trimestre: Realeza, tradición e sucesos
XULLO ofreceu unha das noticias máis seguidas coa benvida oficial á princesa Leonor á Escola Naval de Marín para continuar coa súa formación.
As queixas polo servizo de Monbus ás praias de Marín evidenciaron problemas no transporte en autobús durante o verán.
AGOSTO combinou a polémica do párroco de Bordóns , que renunciou tras darlle unha labazada a un veciño, coa romántica petición de matrimonio de Johnny Güimil durante un festival.
O Baile de Gala do Liceo Casino mantivo a súa tradición con 19 mozos debutantes e un amplo seguimento a través das redes sociais de PontevedraViva.
SETEMBRO achegou a noticiable visita familiar do rei emérito Juan Carlos á princesa Leonor en Marín, xunto aos reis Felipe e Letizia.
A celebración do centenario de Conchita, a mestra "máis chupiguay" do Crespo Rivas, foi unha das historias máis entrañables e máis seguidas na web.
Último trimestre: Entre a solidariedade e a fortuna
OUTUBRO comezou coa renovación de imaxe de PontevedraViva na súa 12º aniversario, acto ao que asistía Alfonso Rueda, presidente da Xunta de Galicia, entre outras autoridades.
O temporal 'Kirk' causaba durante este mes importantes danos nas Rías Baixas, que tiveron un amplo seguimento.
NOVEMBRO destacou pola solidariedade cos afectados pola DANA valenciana con iniciativas privadas e o a marcha de efectivos ás zonas alagadas .
A renuncia de Zara á súa macrotienda en Michelena foi outra das noticias máis vista ao longo deste mes.
A despedida dos Mozos de Arousa do programa 'Reacción en cadea' tras ano e medio imbatibles provocou a reacción dos seus fieis seguidores.
DECEMBRO pechou o ano coa alegría do Sorteo de Nadal, que repartiu o cuarto premio (77768) en varios puntos da comarca, deixando aproximadamente 200.000 euros libres de impostos en cada serie premiada.
Engade Pontevedra Viva como fonte preferida de Google de balde
Mantente informado coas últimas noticias de actualidade.