A Deputación de Pontevedra recibiu 2,5 millóns de euros de fondos Next Generation da Unión Europea.
Este diñeiro destinarase a potenciar a modernización do castelo de Soutomaior.
Segundo indican desde a institución provincial, o diñeiro destinarase a potenciar a iluminación deste Ben de Interese Cultural, mellorar a accesibilidade á Torre da Homenaxe, ademais de introducir as novas tecnoloxías de realidade virtual para as visitas ao castelo.
Está previsto que se realicen reformas nas instalacións eléctricas e na iluminación, por quedarse obsoletas, indican desde o goberno provincial da Deputación de Pontevedra.
A nova iluminación será máis eficiente e vai integrarse no espazo histórico para destacar o valor histórico, arquitectónico e artístico do conxunto histórico, garantindo o tránsito seguro durante as visitas nocturnas.
Na Torre da Homenaxe será cambiada a actual escaleira de caracol por outra de mellores prestacións, adaptándose á normativa vixente de funcionalidade, seguridade e accesibilidade.
Tamén se instalarán ferramentas tecnolóxicas que permitan a través de dispositivos móbiles realizar un percorrido virtual dentro e fóra do castelo utilizando técnicas como a realidade virtual e outros formatos de inmersión.
Esta posibilidade permitirá, segundo a institución provincial, chegar a novos públicos.