En 2026 están previstos máis de 3 millóns de euros para conectar a Avenida de Marín e Rosalía de Castro

A Xunta de Goberno Local do Concello de Pontevedra aprobou este martes 30 de decembro o plan anual de contratación para o exercicio de 2026, que contempla case cen proxectos e investimentos en obra pública e servizos, cun orzamento plurianual de decenas de millóns de euros e unha clara aposta pola transparencia e a flexibilidade na xestión municipal, segundo indicou o alcalde.

Miguel Anxo Fernández Lores explicou que "este é un plan flexible, que se pode modificar segundo as necesidades e oportunidades que vaian xurdindo durante o ano. Inclúe proxectos que se van executar obrigatoriamente, outros que dependen de informes ou condicións orzamentarias e outros que poden entrar se xorden cuestións imprevistas".

Entre os principais investimentos para 2026, figura a modificación e incremento dos límites plurianuais do pavillón de Monte Porreiro, cunha consignación de 2.280.000 euros para 2026, 2.300.000 euros para 2027 e 1 millón para 2028. "Está contratado xa, pero non se inicia este ano 2025, queda para os seguintes exercicios", indicou o rexedor.

No documento aprobado, salientan obras e servizos que superan os 100.000 euros, como o proxecto unificado de construción do vial de conexión entre a Avenida de Marín e a rúa Rosalía de Castro, cun investimento de 3.079.852 euros, a cifra máis elevada deste plan.

Tamén figuran obras de similares cifras como a rehabilitación estructural e enerxética do Pazo da Cultura (máis de 3 millóns), a renovación das instalacións de iluminación pública do centro urbano (2,3 millóns), a renaturalización da parcela de Costas en Mollavao (1.100.000 euros) ou o mantemento integral dos centros educativos (3 millóns).

Tamén destaca a previsión de contratación de novos servizos como o seguro de asistencia sanitaria para persoal municipal (2,2 millóns), o contrato plurianual de limpeza de dependencias que inclúe os colexios (2,2 millóns), e o servizo de prevención da lexionelose en edificios municipais (1,2 millóns).

Outros proxectos relevantes previstos para 2026 son a renovación de servizos na rúa Casimiro Gómez (908.891 euros), o novo contrato anual de mantemento de viario urbano e espazos públicos (900.000 euros), a mellora da accesibilidade na rúa Luis Seoane (304.230 euros).

Tamén se recolle a rehabilitación da terceira planta do edificio municipal de Michelena 30 (450.000 euros), e actuacións nas zonas axardinadas das rúas Luxemburgo, Irlanda, Reino Unido e Alemaña en Monte Porreiro (350.000 euros).

Está previsto, ademais, o cambio das butacas do Teatro Principal por unha cantidade de 300.000 euros.

Segundo Fernández Lores, "son case cen proxectos previstos, algúns efectivos, outros poden variar segundo as circunstancias, porque este plan está pensado para se adaptar ás necesidades reais da cidade e das persoas".