Aos premios de banda deseñada (BD) a prol da igualdade Virxinia Pereira saíronlle 21 candidaturas. É o número de traballos que se presentaron para esta primeira edición do galardón, que promove o Concello de Pontevedra en colaboración co debuxante Kiko da Silva e a escola de BD O Garaxe Hermético.
Os premios de BD Virxinia Pereira nacen co dobre obxectivo de visibilizar ás escasas autoras de banda deseñada que existen ata agora e impulsar a perspectiva de xénero neste ámbito. Por este motivo, o fallo darase a coñecer coincidindo co Día Internación da Muller, o 8 de marzo. Ademais, a entrega dos premios incluirá a homenaxe a unha autora de banda deseñada para recoñecer o seu traballo e abrir as portas a referentes femininos neste sector.
As 21 personas que participan no certame presentaron unha historieta orixinal de seis páxinas de BD con contidos que fortalecen a reflexión crítica sobre o papel social das mulleres e homes e, ademais, fixérono en galego.
As historietas gañadoras serán a base dunha exposición de banda deseñada que formará parte da programación dos actos do 8 de Marzo e conformará unha publicación destinada aos centros educativos.
O primeiro premio suporá un galardón económico de 2.000 euros e un curso de verán no Garaxe Hermético; o segundo premio, 1.000 euros e un lote de banda deseñada; e o terceiro, 500 euros e un lote de banda deseñada. Ademais, publicaranse os tres traballos.