Finaliza a campaña electoral e o candidato do Partido Socialista de Marín pide por última vez o voto aos seus veciños para que "volvamos ter o dinamismo económico e social que nos merecemos".
Asegura Manuel Pazos que "os marinenses, todos xuntos, temos que decidir este domingo cara onde queremos que se dirixa Marín nos próximos catro anos. Ou ben por un modelo continuista que xa sabemos que resultados trae para Marín, ou ben un modelo que aborde dunha vez os problemas profundos que temos por diante".
Por eses motivo Pazos pide aos marinenses "que aposten por un cambio tan necesario como improrrogable".
Entre os motivos para iso, o PSOE asegura que "todo o mundo é consciente de que Marín está a quedar atrás en moitísimos temas como a falta de vivenda, de chan empresarial, de servizos, a perda de comercios, de poboación…", uns problemas que "xa non se poden ocultar por máis tempo".