A nova residencia de maiores de Cerdedo-Cotobade é xa unha realidade. Está previsto que o novo servizo abra as súas portas a finais de ano, pero este luns produciuse a inauguración das instalacións, resultado da ampliación da residencia actual de Cerdedo.
O presidente da Xunta de Galicia, Alfonso Rueda, participou na inauguración desta ampliación, xunto co alcalde, Jorge Cubela, e a conselleira de Política Social e Xuventude, Fabiola García.
A Xunta de Galicia investiu 2 millóns de euros nestas instalacións, que se integrarán coas dos outros centros do municipio e suma 46 novas prazas públicas á Rede de Coidados a Persoas Maiores de Galicia.
Sumadas ás dos outros centros do municipio, farán un total de 64 prazas públicas de atención residencial e 30 de atención diúrna.
A voceira do PSOE en Cerdedo-Cotobade, Lina Garrido, sinalou, despois da inauguración, que lamenta que o presidente da Xunta non clarificara o tipo de xestión baixo o que vai a desenvolver a súa actividade.
"A día de hoxe non se sabe si o centro vai a ser de xestión pública ou privada", critica Lina Garrido, que tamén lamenta que o centro leva rematado e co seu equipamento dende novembro do 2021 e cunha lista agarda de 1.500 persoas en Galicia esperando por unha praza.
Lina Garrido tamén critica que a data de inicio da actividade estaba prevista para o 12 de xaneiro de 2022, contando coa licencia de apertura correspondente.
RESIDENCIAS EN GALICIA
Alfonso Rueda salientou que os novos servizos para maiores de Cerdedo-Cotobade se incorporan ás 13.000 prazas públicas de residencias existentes en Galicia, o triplo que as existentes no ano 2009, e incidiu no compromiso da Xunta co benestar dos maiores.
O presidente galego destacou que "toda a xente que traballou durante toda a súa vida, que achegou e se esforzou para que os seus fillos tiveran unha vida mellor merecen coidados e servizos de primeiro nivel, como o que acabo de visitar"..
O mandatario tamén fixo referencia ademais ao proceso de fusión municipal emprendido por Cerdedo-Cotobade en 2017, o que lle permite contar con máis axudas da Xunta que redundan en mellores servizos
Engade Pontevedra Viva como fonte preferida de Google de balde
Mantente informado coas últimas noticias de actualidade.