A área sanitaria de Pontevedra e O Salnés ten este sábado un paciente con coronavirus ingresado na Unidade de Coidados Intensivos (UCI) do Hospital Montecelo. Trátase dun enfermo ingresado en planta nos últimos días cuxa situación se complicou e que volveu a levar a Covid-19 á unidade de críticos 19 días despois.
A área de UCI da área sanitaria quedara libre de coronavirus o pasado 4 de maio e, desde entón, si houbo días con pacientes ingresados en planta nos distintos hospitais, pero ninguén en situación crítica. Foi aquel día a primeira área sanitaria de Galicia sen pacientes críticos.
Este sábado 23 de maio tan só este paciente de UCI está hospitalizado, pois non hai pacientes positivos en planta de ningún dos hospitais públicos ou privados da área sanitaria.
Ademais, hai 36 pacientes que evolucionan no seu domicilio tras dar positivo, de modo que os casos activos elévanse a 37, tres menos que o venres.
Desde o inicio do plan de continxencia do COVID-19 curáronse 826 pacientes nesta área sanitaria, dos que nove foron nas últimos 24 horas. Ademais, faleceron 16 pacientes.
Segundo a última actualización da Dirección Xeral de Saúde Pública da Consellería de Sanidade, o número de casos activos de coronavirus en Galicia é de 884, deles 221 son da área da Coruña, 56 da de Lugo, 127 da de Ourense, 37 da de Pontevedra, 264 da área de Vigo, 151 da de Santiago, e 28 da de Ferrol.
Do total de pacientes positivos, 11 permanecen en UCI, 66 están en unidades de hospitalización e 807 no domicilio. Por agora, en Galicia hai un total de 9.684 persoas curadas e rexistráronse 612 falecementos.
O número de PCR realizadas é de 133.153 e o número de casos de coronavirus detectados en centros residenciais de servizos sociais de Galicia supoñen o 0,3% do total das persoas residentes. En toda Galicia contabilízanse 76 usuarios e 82 profesionais contaxiados en centros residenciais e producíronse 132 falecementos en residencias e 139 en hospitais e residencias integradas.
A Consellería de Sanidade reitera que a cidadanía empregue o número 061 só para emerxencias ou casos graves e aconsella utilizar o número gratuíto do 900 400 116 para consultar dúbidas ou síntomas leves de coronavirus. Neste número pódense resolver todas as dúbidas dos cidadáns respecto diso e tamén consultar sintomatoloxía leve.
Sinalar, ademais, que o Sergas ten ao dispor da cidadanía unha páxina web, na que se pode consultar información dirixida á poboación, aos profesionais sanitarios e a outros colectivos.