A terceira vaga da covid-19 está a demostrar ser moi máis intensa que as anteriores. E, por agora, non ten visos de frear. A área sanitaria de Pontevedra e O Salnés, que rexistrou 161 contaxios máis nas últimas horas, pulverizou o seu pico nesta pandemia.
Os casos activos por coronavirus ascenden a un total de 1.485. Nunca antes alcanzárase esta cifra. E o que é peor, a presión asistencial segue aumentando e xa son case 100 os pacientes con covid-19 que están hospitalizados nos tres centros sanitarios da área.
Hai, en concreto, 97 persoas ingresadas, nove máis que onte. A maior parte deles (83) están en planta. O Hospital Montecelo atende a 64, mentres que oito están no Hospital do Salnés e once no hospital QuirónSalud Miguel Domínguez.
Catorce persoas atópanse ingresadas na unidade de coidados críticos (UCI) de Montecelo. Son os pacientes máis graves da covid-19 na área sanitaria.
O resto dos que contraeron o virus, outras 1.388 persoas, atópanse illadas nos seus domicilios e recuperándose baixo supervisión médica.
Desde o inicio da pandemia 7.112 pacientes da área sanitaria superaron a covid-19, 48 nas últimas 24 horas, e rexistráronse 96 falecementos asociados ao virus. Os últimos, dous homes de 78 e 92 anos en Montecelo.
En canto á realización de probas PCR, fixéronse na área sanitaria de Pontevedra e O Salnés un total de 129.727, 1.368 nas últimas horas. A estas probas súmanse as 49.434 seroloxías realizadas ata a data.
INCIDENCIA EN GALICIA
A nivel autonómico a Dirección Xeral de Saúde Pública informa que o número de casos activos de coronavirus en Galicia é de 17.125, 995 máis que o día anterior. Deles 4.414 son da área da Coruña, 1.449 da de Lugo, 2.413 da de Ourense, 1.485 da de Pontevedra, 3.153 da área de Vigo, 2.843 da de Santiago e 1.368 da de Ferrol.
Do total de pacientes positivos, 137 están en UCI, 575 en unidades de hospitalización e 16.413 no domicilio. Por agora, en Galicia hai un total de 64.662 persoas curadas, rexistrándose 1.584 falecementos.
Desde o inicio da pandemia realizáronse en Galicia 1.297.047 probas PCR e 480.258 probas serolóxicas que, nas últimas 24 horas, permitiron detectar a 1.505 infectados.