Persoal directivo da Autoridade Portuaria de Marín participou nun panel de expertos organizado pola Universidade da Coruña para o desenvolvemento de diferentes iniciativas para desenvolver a tecnoloxía blockchain para o transporte marítimo.
Trátase de crear plataformas que poden rastrexar datos críticos sobre un contedor dentro da cadea loxística pero que pode aplicarse a calquera outra mercadoría dentro do transporte marítimo.
O Grupo de Investigación en Tecnoloxía Electrónica e Comunicacións da Universidade da Coruña está a valorar diversas patentes encadradas nos principios da Industria 4.0, relacionadas principalmente coa trazabilidade da mercadoría.
O acto estaba orientado a avaliar a aplicabilidade desta tecnoloxía nas contornas portuarias. En concreto, presentáronse dispositivos de baixo consumo que permiten a identificacíon e seguimento de elementos físicos e/ou persoas en diferentes escenarios.
Isto podería achegar información crave para a xestión do paso da mercadoría por un nodo loxístico como un porto, aumentando o valor dos servizos prestados.
O Porto de Marín participou coa súa experiencia en distintos ámbitos da cadea loxística como o movemento de seccións eólicas, o transporte terrestre interior, o transporte ferroviario ou os contedores reefer (refrixerados) para os que Marín é un referente na fachada atlántica, tanto para tráfico de froita como de pesca conxelada.