O continxente da Brigada de Infantaría Lixeira Aerotransportable (Brilat) que está a realizar a Misión de Adestramento da Unión Europea (EUTM) en Malí regresará á casa de forma inminente. Fontes militares confirmaron este mércores que ese regreso se producirá nos próximos días.
Os militares, ao redor de 110, regresarán a España en dúas rotacións diferentes para as que aínda non se fixo pública a data, pero que en todo caso non será antes do 8 de maio, segundo sinalaron as mesmas fontes.
Os efectivos da Brigada conformaron o quinto continxente da misión española en Malí. A misión está estruturada nunha Compañía de Protección da Forza xerada sobre a base da segunda Compañía do Batallón Zamora, pertencente ao Rexemento de Infantaría Isabel la Católica 29, e nun Equipo de Instrutores de Apoios de Lume, no que se encadran oficiais e suboficiais do Grupo de Artillaría de Campaña VII e do Rexemento Isabel la Católica 29.
Este regreso inminente dos efectivos da Brilat implica o despregamento do sexto continxente español da EUTM en Malí, formado sobre a base do Rexemento de Infantaría Lixeira (RIL) Soria 9, que xa realizou un acto de despedida antes de partir a zona de operacións o 24 de abril no acuartelamento Puerto del Rosario de Fuerteventura.
Os soldados están despregados dende o mes de novembro na capital de Mali, Bamako, e na localidade de Koulikoro, unha pequena e tradicional localidade situada na ribeira oeste do río Níxer, a 60 quilómetros da capital maliense. O obxectivo da misión que asumiu a Brigada é apoiar ás forzas armadas de Mali mediante o asesoramento nos ámbitos do mando e control, da loxística, dos recursos humanos e do dereito humanitario internacional, ademais do adestramento das unidades de combate malienses para que alcancen a capacidade suficiente que lles permita actuar, de forma autónoma, fronte á ameaza yihadista do norte do país.
Dende o inicio da misión, a estratexia militar de EUTM Mali foi contribuír á restauración da capacidade militar das forzas armadas malienses, que é o factor determinante para alcanzar o "estado final desexado" segundo o plan europeo. España é, xunto con Francia, o país europeo que realiza un maior esforzo pola estabilidade de Mali.