Non te rendas nunca. É a mensaxe que a Fundación ONCE mandou este xoves aos mozos con discapacidade de Pontevedra. Foi tras a chegada á cidade de "Esta oportunidade non pasa todos os días", unha campaña itinerante sobre rodas que se integra no plan de inclusión laboral deste organismo.
O obxectivo da campaña, impulsada por Inserta Emprego, a entidade para a formación e o emprego da fundación, é atraer a 5.000 mozos parados de entre 16 e 29 anos de todo o territorio español que posúan certificado de discapacidade igual ou superior ao 33%, e dotalos de recursos que melloren a súa empregabilidade.
No caso de Pontevedra, a información darase nun autobús que, ata este venres 3 de agosto, está aberto en horario de mañá e tarde na Praza de España.
A directora rexional en Galicia de Inserra Emprego, Menchu Iglesias, explicou que os mozos con discapacidade, uns 4.000 en toda Galicia, teñen "un pouco máis complicado" atopar traballo e catro de cada dez aínda non tiveron a súa primeira oportunidade laboral.
Esta oficina de información itinerante está dotada do persoal e as áreas necesarias para informar os mozos que as visiten de todos os recursos que teñen ao seu alcance para formarse e responder á actual demanda de emprego das empresas do noso país.
Conta cun espazo grupal para o desenvolvemento de talleres así como unha área privada destinada ás entrevistas individuais e unha zona de traballo para a inscrición de candidaturas.
Ao mesmo tempo, a fundación trata de concienciar ás empresas privadas que as persoas con discapacidade "son un valor seguro" e que apostar por elas achega, ademais do talento, competencia e capacidade "que temos todas as persoas", un "plus de rendibilidade", segundo destacou Iglesias.
A crise económica, recoñece, "fíxonos dar algúns pasos atrás" pero asegurou que "estamos de novo en camiño" para lograr esa igualdade de oportunidades, polo que pediu aos mozos con discapacidade que "non se rendan" porque a actitude "é moi importante".