O ano 2016 foi de récord para o porto de Marín. Nos últimos doce meses rexistrouse un movemento de mercadorías de 2.342.891 toneladas, un rexistro histórico que supera nun 9,38% o tráfico certificado o ano anterior.
Así o recolle o primeiro balance provisional do exercicio que, segundo a autoridade portuaria, consolida a tendencia ao crecemento continuo do porto marinense durante os últimos anos.
O aumento de mercadorías dáse tanto nos graneis sólidos que crecen un 4,33%, como na mercadoría xeral, cunha porcentaxe do 14,28% superior ao do ano anterior.
Pero, sen dúbida, o máis significativo é o aumento no tráfico de colectores nos últimos exercicios, logrando dúas subidas consecutivas do 41% e do 73% respectivamente nos dous últimos anos, especialmente desde que Maersk optou por operar desde Marín e non desde Vigo.
Estes datos demostran, destacan desde o porto, que Marín converteuse nun porto de referencia internacional como porta de entrada a Europa, en especial para os tráficos procedentes do continente americano.
Entre as principais mercadorías en colector seguen estando as froitas e hortalizas das que Marín é porto hub no Arco Atlántico para a recepción, almacenamento e distribución. En canto á mercadoría convencional, o maior crecemento rexístrase no capítulo de aparellos, ferramentas e maquinaria.
A falta do peche de datos definitivo, a pesca fresca conseguiu novamente rexistros significativamente superiores aos do ano anterior. En canto á pesca conxelada, rexistrouse tamén un aumento importante con respecto a 2015.
Tamén aumentou a capacidade dos buques que atracaron nos peiraos comerciais do porto de Marín, que experimentou un crecemento do 17%.