A CIG-Ensino denuncia un "novo intento" da Consellaría de Educación por "empeorar" as ensinanzas artísticas superiores ao pretender recortar postos na Escola de Restauración de Bens Culturais en Pontevedra.
Dende a central nacionalista lembran que hai agora xusto un ano, en xullo de 2017, a inspección educativa de Pontevedra, "cun ánimo máis de vendeta que do papel que lle debe corresponder", quixo facer recortes neste centro que, despois de numerosas protestas, finalmente non levaron a cabo.
Agora, un ano despois, a inspección "volve á carga" nun "novo ataque" no que o mesmo inspector anuncia a redución de 1 ou 2 postos de profesorado na Escola de Restauración de Bens Culturais de Pontevedra, o que implicaría suprimir case a totalidade das prazas creadas pola Consellaría para a implantación do título superior en Conservación e Restauración de Bens Culturais.
A CIG-Ensino apoia totalmente a posición expresada polo profesorado do centro e o seus equipo directivo e esixe o mantemento do actual cadro de persoal na escola.