A Deputación de Pontevedra aprobou este venres en Xunta de Goberno, axudas por tres millóns de euros destinadas a once concellos da provincia.
Segundo informou en rolda de prensa o vicepresidente da Deputación, César Mosquera os municipios de Barro, Bueu, Caldas de Reis, Cambados, Meaño, Moraña, Pontecesures, Porriño, Portas, Redondela e Silleda serán os beneficiarios destas subvencións do Plan Concellos.
Entre outros proxectos, para Cambados destínanse 371.448 euros para a mellora de camiños rurais; outros 81.298 euros son para que Portas realice o saneamento de augas residuais en Piñeiro e Currás; 77.309 euros para que Barro mellore o viario no lugar de Mane de Arriba e 107.894 euros para que Moraña pavimente camiños municipais.
Do mesmo xeito, tamén se aprobaron dúas achegas para Caldas de Reis que suman 295.922 euros, unha partida de 95.025 para a subministración dun vehículo todoterreo con cesta elevadora para o alumado público e 200.897 euros cos que se ampliará a rede de saneamento no tramo O Pazo – Santa María.
A Xunta de Goberno tamén aprobou unha achega de 159.342 euros para que Bueu adquira unha parcela para uso como estacionamento e servizo de caravanas e autocaravanas.
Ademais a Deputación aprobou o proxecto de mellora da mobilidade peonil da estrada provincial EP-9302, que transcorre polo Concello de Meaño, que incorporará dous espazos de prioridade peonil coa construción de plataformas únicas sobreelevadas ao paso polos núcleos rurais de Broullón (Xil) e Aldea de Abaixo (Covas).
As obras, que contarán cun orzamento de 375.468 euros, financiaranse cun convenio no que a Deputación achegará o 70% e a institución municipal o 30% restante.
Trátase dunha estrada que comunica Xil, Cobas e Barrantes ao longo de 6 quilómetros e rexistra non só tráfico local, senón tamén de rango comarcal polo Salnés.
Engade Pontevedra Viva como fonte preferida de Google de balde
Mantente informado coas últimas noticias de actualidade.