A presidenta da Deputación de Pontevedra, Carmela Silva, anunciou que o organismo provincial axilizará "aínda máis" o pago a empresas e provedores para inxectar liquidez na economía e garantir a "supervivencia" do tecido empresarial.
Todos os servizos administrativos recibiron a instrución de apurar "ao máximo" a tramitación destes pagos, para avanzar "ata o límite do que permita a normativa" para axudar a empresas e autónomos.
Silva advirte que a crise sanitaria do coronavirus está a se transmitir a unha "velocidade inusitada" á economía da provincia, o que afectará o benestar dos cidadáns.
Esta será, segundo a dirixente provincial, unha "prioridade absoluta" para o seu goberno que xa era, segundo os datos do Ministerio de Facenda, unha das administracións que antes realiza os seus pagos, cun período medio de once días.
"Estamos a falar dun asunto moi sensible", defendeu Carmela Silva, que asegura que hai procedementos "que poden esperar", pero este non é un deles.
Ademais, a presidenta provincial confirmou que activará un fondo de liquidez, dotado con 21 millóns de euros, para anticipar aos concellos de Pontevedra que teñan delegadas as súas competencias recadatorias no ORAL da Deputación.
Este diñeiro sairá da contía recadada polo pago de taxas de 2019, uns 18 millóns de euros, máis un incremento de 3 millóns de anticipo da recadación do imposto de vehículos, que non poderá ser cobrado en prazo debido ao estado de alarma.