A demolición dos inmobles que a Deputación ten na Xunqueira de Alba están a piques de rematar. A presidenta Carmela Silva informou este venres do avanzado estado das obras de demolición do Parque de Maquinaria e a Imprenta Provincial que dará paso á rexeneración integral da primeira zona húmida de Galicia declarada Espazo Natural de Interese Local (ENIL).
Os traballos de demolición “están xa practicamente rematados, xa están demolidos os dous edificios”, sinalou a presidenta, que concretou que na actualidade se está xa a proceder “ao derribo dos elementos de urbanización". Unicamente quedan pendentes de retirar elementos accesorios para posteriormente, “de xeito inmediato”, poder sanear os terreos e proceder á rexeneración da Xunqueira.
O investimento global da demolición e recuperación da Xunqueira de Alba ascende a preto de 4,5 millóns de euros e permitirá “recuperar uns 17.000 metros cadrados, dotando a Pontevedra dunha inmensa zona de espazos abertos nos que imos devolver o espazo público e medioambiental ás persoas”, asegurou.
A rexeneración está dividida en tres etapas. En primeiro lugar a preparación dos firmes e pavimentos para a formación dun novo sendeiro peonil, en segundo lugar a dotación de iluminación e mobiliario para crear zonas de esparexemento e ocio, e finalmente a plantación da cobertura vexetal nunha superficie de máis de 13.000 metros cadrados e a formación dun “bosque mixto”.
A rexeneración completa dos terreos será unha realidade no prazo de tres meses, avanzou a presidenta.
Ademais, Carmela Silva tamén informou do estado das obras do novo Parque de Maquinaria que se están a acometer en paralelo no Polígono de Barro para o traslado desta dotación, tamén en estado avanzado.
Doutra banda, a Xunta de Goberno deste venres serviu tamén para aprobar investimentos no ámbito da Cultura por valor de 240.000 euros para financiar catorce festivais musicais na provincia, entre eles o Millo Verde de Redondela. Estes fondos servirán tamén para a proxección de películas nomeadas aos premios Mestre Mateo en diferente concellos de Pontevedra ou seguir apostando por converter a provincia nun estudio de cinema.
Do mesmo xeito, a Deputación promove roteiros literarios guiados por diferentes municipios da provincia. O programa chegará a Pontevedra o próximo 18 de xuño da man de Adolfo Camaño
Por outro lado, a Deputación ten rematado xa o proxecto para acondicionar a Casa de Combarro para convertela no centro da promoción turística desta vila de Poio. A institución provincial investirá 136.000 euros para realizar obras de mellora que corrixan o seu deterioro actual co fin de poder executar un proxecto de musealización na casa barroca.
Engade Pontevedra Viva como fonte preferida de Google de balde
Mantente informado coas últimas noticias de actualidade.