Luis Menor, presidente da Deputación de Ourense, mantivo un encontro con alcaldes asinantes do Pacto de Pedre, encabezados por Jorge Cubela, rexedor de Cerdedo-Cotobade. O representante provincial sinalou que o tráxico accidente de Noiteboa de 2022 con sete persoas falecidas mostrou a "crueza da situación de falta de seguridade" da vía que vertebra ás dúas provincias.
O presidente ourensán insistiu na importancia da petición unánime dos alcaldes dos municipios afectados nas dúas provincias e advertiu que a estrada se atopa "igual que hai 30 anos, salvo algún remendo que en nada cambiou a situación". Demanda o aumento de seguridade "pois as mortes non as podemos soportar".
Menor tamén insistiu en que a N-541 ten un gran valor estratéxico para o desenvolvemento económico dos dous territorios e entende a necesidade de combinar a reforma coa creación dunha vía de alta capacidade que una as capitais das provincias de Ourense e Pontevedra.
Jorge Cubela agradeceu o apoio e a sensibilidade de Luis Menor respecto a a petición da mellora integral da N-541 debido á grave inseguridade para as persoas que presenta con numerosos sinistros de tráfico. Neste sentido, esixe unha capa de rodadura no seu trazado integral e a mellora nos accesos aos núcleos de poboación.
REUNIÓN CON GONZALO PÉREZ JÁCOME
O colectivo de representantes do Pacto de Pedre tamén mantivo un encontro co alcalde de Ourense, Gonzalo Pérez Jácome, que propoñerá a todos os grupos políticos da corporación levar a pleno como moción conxunta ou declaración institucional a adhesión ás reivindicacións recollidas polos municipios afectados que forman parte do Pacto de Pedre esixindo ao Goberno de España a intervención coa maior urxencia posible para realizar a mellora integral da N-541.
Tamén propoñerá solicitar aos grupos políticos do Parlamento de Galicia que apoien as súas reivindicacións, demandando á Xunta e ao Goberno Central o inicio dun estudo para crear a autovía Pontevedra-O Carballiño, con conexión cara a Lalín.