A Deputación de Pontevedra súmase ao proxecto de 'Cálculo de pegadas de carbono e proxectos de absorción' que impulsa a Rede Española de Cidades polo Clima da Federación Española de Municipios e Provincias (FEMP).
Carmela Silva, presidenta provincial, considera que esta proposta forma parte da aposta da institución para traballar pola sustentabilidade e dar cumprimento aos retos da Axenda 2030. A idea é dar un paso máis para implicar a outras áreas da Deputación o que xa se está desenvolvendo no Pazo Provincial co rexistro de consumos no marco do sistema de Xestión Ambiental.
A Rede polo Clima da FEMP rexistrará a pegada de carbono que xera a Deputación e despois van desenvolverse actividades que permitan compensar as emisións. Analizarase primeiro a pegada de carbono xerado pola institución provincial co estudo dos datos de consumo das súas instalacións tanto relacionados co gasto eléctrico como de gasóleo e outros combustibles. Tamén se analizará o gasto de papel e a xestión de residuos.
Poñerase en marcha un plan para rebaixar o consumo de electricidade, calefacción e papel, ademais de fomentar o transporte público. Tamén está previsto desenvolver repoboacións forestais ou con actuacións en zonas incendiadas para o restablecemento da masa forestal.