O vicepresidente da Deputación de Pontevedra e responsable do Museo Provincial, Rafa Domínguez, saíu ao paso da dimisión de todos os membros do Consello Asesor da institución museística, formalizada por rexistro este mesmo xoves.
O vicepresidente manifestou que a renovación do Consello Asesor do Museo de Pontevedra era unha medida que "forma parte da folla de roteiro que temos establecida para abrir a entidade á sociedade civil, sen distincións ideolóxicas".
O responsable político do Museo de Pontevedra lembrou que a composición actual do Consello Asesor finalizaba no mes de decembro e que os actuais integrantes "foran nomeados polo anterior goberno do PSOE e BNG e feitos a imaxe e semellanza do seu director".
Domínguez remarcou o "papel fundamental" que debe desenvolver este órgano de consulta e asesoramento en asuntos relacionados coa dirección e xestión do Museo de Pontevedra e agradeceu o traballo desenvolvido ata o de agora polos seus integrantes.
Rafa Domínguez apuntou que coa entrada dun novo equipo directivo no Museo o normal é un novo Consello Asesor, algo que enmarca nos "trámites normais de renovación cando hai cambios políticos".
Ademais, avanzou que o goberno provincial levaba semanas traballando nunhas novas bases para a selección "transparente e equitativa" dos membros do futuro Consello Asesor que, en liñas xerais, estará integrado por "persoas expertas en diversas disciplinas" relacionadas coa cultura, o patrimonio e a arte, dándoselle prioridade á inclusión de representantes da comunidade local de Pontevedra e a persoas cun "compromiso destacado coa promoción e preservación do patrimonio cultural da cidade".
Tamén está previsto incluír "talentos emerxentes no ámbito da cultura e do patrimonio", procurando tamén un equilibrio de xénero na súa composición "para asegurar unha representación igualitaria de homes e mulleres".
Por último, o vicepresidente explicou que, ademais de renovar os seus integrantes, o papel do Consello Asesor tamén se reformulará para "fortalecer o labor deste organismo e abrir o Museo á sociedade civil sen distincións ideolóxicas" incluíndo a novos membros "con enfoques diferentes e perspectivas frescas e diversas que enriquezan as discusións e decisións" e para iso tamén está previsto incrementar a frecuencia das reunións.