A partir do próximo luns, día 18 de xullo, a igrexa de San José de Campolongo suspenderá a celebración do culto. O motivo é a reparación da cuberta do edificio.
Non é o único templo da cidade de Pontevedra que necesita reparacións pois tamén San Bartolomeu, co retablo roto, leva anos esperando unha intervención por parte de expertos en restauración.
En canto a San José de Campolongo, a celebración das misas diarias trasladaranse temporalmente a outro local mentres que funerais ou primeiras comuñóns desprazaranse a outras parroquias da cidade.
Por motivos de seguridade non se poderá continuar coa actividade relixiosa no templo mentres se substitúe o tellado para eliminar as pingueiras e filtracións que presenta.
Esta reparación está orzada nuns 250.000 euros que se financiarán, entre outras vías, cun préstamo e doazóns dos fregueses.
SAN BARTOLOMEU
Tamén a igrexa de San Bartolomeu ten pendente acometer traballos de restauración. No seu caso, a parroquia solicitará autorización ao Arcebispado de Santiago para que a Dirección Xeral de Patrimonio estude unha proposta de rehabilitación do retablo principal e dos altares laterais da Madalena e o de Santa Catalina.
Son varios os problemas que presenta o retablo maior cuxa parte central é do século pasado aínda que o conxunto ao completo pertence á segunda década do XVIII. O 17 de abril de 2018 un individuo empolicouse ao baldaquino central coa intención de derrubar a imaxe de San Bartolomeu. Na súa escalada chego a tirar o Sagrario ao chan e desprazou o retablo do seu sitio. A día de hoxe permanece apontoado cuns tacos de madeira.
Durante a valoración dos danos causados por este perturbado, os técnicos do Museo de Pontevedra comprobaron a existencia de caruncho nalgúns elementos do retablo así como nas figuras relixiosas de Santiago Apóstolo e San Roque, ademais de problemas de humidade nos altares laterais.
A administración parroquial descoñece o custo que poderá ter este proxecto de restauración.
SAN MARTIÑO DE SALCEDO
Pola súa banda, a igrexa de San Martiño de Salcedo segue sen data para a súa reapertura desde que pecharon as súas portas en novembro de 2018 polo perigo de desprendemento da bóveda e do coro.
A Consellería de Cultura expresara a súa intención de asumir os 350.000 euros nos que o Arcebispado de Santiago de Compostela valorara a restauración do templo.