O Instituto Galego da Vivenda e Solo iniciou esta semana o procedemento de contratación de varios traballos e servizos relacionados coas obras para a construción dun total de 74 novas vivendas de promoción pública en Pontevedra.
O contrato foi licitado en lotes que se corresponden por un lado coa dirección de execución dos traballos e por outro, cos servizos de coordinación de seguridade e saúde.
Unha vez iniciado o procedemento, todas as empresas e profesionais interesados en optar a un ou varios lotes poderán presentar as súas ofertas ata o vindeiro 14 de febreiro. Os prazos para a execución dos traballos varían entre os 51 e os 60 meses, segundo o caso.
Os servizos de dirección de obra e de seguridade a contratar permitirán executar 74 novas vivendas públicas en Valdecorvos, unha promoción cuxas obras foron licitadas pola Xunta a finais de decembro por 15 millóns de euros.